الركراكي يستقر على بديل أوناحي

استقر وليد الركراكي، مدرب المنتخب المغربي الأول، على اللاعب اللي غادي يعوض غياب عز الدين أوناحي فباقي مباريات كأس أمم أفريقيا 2025، من بعد الإصابة اللي سالات مشاركتو فالبطولة.

أوناحي تعرض لإصابة خطيرة فالتداريب ديال أسود الأطلس، والفحوصات الطبية بينات باللي غادي يغيب على الميادين تقريبًا 6 شهور، يعني مشاركتو فكان أفريقيا سالات. ومع ذلك، قرر يبقى مع المجموعة باش يساند صحابو معنوياً رغم ما غاديش يلعب.

الركراكي كيحسم فبديل أوناحي

وحسب معطيات توصل بها موقع “winwin”، فبلال الخنوس ولى هو الخيار الأول عند وليد الركراكي باش يعوض أوناحي. الخنوس لعب بلاصتو فالماتش اللي فات ضد منتخب تنزانيا، وقدّم مستوى مزيان خلا الطاقم التقني يثق فيه.

وزاد نفس المصدر أن الركراكي بدا كيبني طريقة اللعب فالتداريب على أساس وجود الخنوس فبلاصة أوناحي، وهاد الشي كيبين باللي هو البديل اللي تعوّل عليه لتعويض نجم جيرونا الإسباني. المدرب كيشوف باللي الخنوس قادر يقوم بالأدوار المطلوبة فوسط الميدان، سواء فالربط بين الخطوط ولا فبناء اللعب، وهاد الشي كيخليه الاختيار الأساسي فالفترة الجاية من البطولة.