عرفت الدار البيضاء اجتماع مهم حضر فيه مسؤولو الوداد والرجاء وسلطات المدينة، وتوصلو فالأخير لمذكرة تفاهم جديدة كتهم تنظيم الديربي.
الاتفاق أكد أن أبواب مركب محمد الخامس غادي يتحلو من عصر الأربعاء، أي أربع ساعات قبل انطلاق المباراة، باش تسهل عملية الدخول وتتفادى الازدحام اللي كان كيدير مشاكل تنظيمية فالمباريات السابقة.
وتم الاتفاق حتى على واحد الإجراء جديد: الجمهور ديال الفريق اللي غادي يخسر هو اللي خاصو يخرج الأول من الملعب، قبل جمهور الفريق الفائز بنصف ساعة، باش ما يكونوش احتكاكات ولا مشاكل بين الجماهير من بعد نهاية الماتش.
أما من ناحية الأمن، فتم تخصيص حوالي 5000 رجل أمن من مختلف الأجهزة لتأمين الدار البيضاء ومحيط الملعب وحتى المدرجات، باش تمر المباراة فظروف مثالية.
🔰 تشابه في الوضعية بين الغريمين
الرجاء والوداد داخلين للديربي وهم فحالة متقاربة، الرجاء متقدم بنقطة على الوداد اللي عندو مباراة ناقصة، وجوجهم ما خاسروش لحد الآن وكيعيشو فترة زوينة فالمسابقة.
الرجاء بدّل مدربو التونسي الأسعد الشابي بعد جولتين فقط بسبب الأداء، ماشي النتائج، وجاب فادلو دافيدز اللي عندو خبرة سابقة فالنادي.
أما الوداد فباقي مع المدرب أمين بنهاشم اللي حافظ على بلاصتو بدعم من آيت منا رغم المشاركة المخيبة فمونديال الأندية فميريكان.
الفريقين عندهم 9 لاعبين من المنتخب المحلي اللي ربح كأس الشان الصيف اللي فات مع السكتيوي فكينا، وغادي يدخلو الديربي بصفوف مكتملة بعد ما رجع حمزة هنوري، الهداف ديال الوداد، للتداريب من بعد الإصابة اللي تعرض ليها ضد أشانتي الغاني.
💚 أفضلية طفيفة للرجاء وخبرة فالدو
فالدو مدرب الرجاء عندو تجربة مزيانة فهاد النوع من المباريات، حيث كان مساعد المدرب الألماني زينباور قبل موسمين وتوج معهم بالدوري وكأس العرش، وواجه الوداد 3 مرات وفاز فيهم كاملين، وهاد الشي كيعطيه دفعة معنوية كبيرة.
الإحصائيات التاريخية باقية فصالح الرجاء:
✅ الرجاء ربح 38 ديربي
✅ الوداد ربح 34
⚖️ والتعادل كان فـ66 مناسبة
الرجاء مسجل 120 هدف مقابل 110 ديال الوداد.
ومن أبرز أوراق الرجاء فالماتش كاين آدم النفاتي، عبد الله خافي وصابر بوغرين، اللي كيعوّل عليهم فالدو باش يحسم القمة لصالح النسور الخضر. 🦅