مّن بعد ما تألق بزاف فْ كأس العالم لْ أقل مّن 20 عام اللي تْلعْب فْ الشيلي، واللي ربْحو فيه أشبال الأطلس اللقب العالمي لأول مرة فْ التاريخ ديال الكُرة المغربية، اللاعب الدولي الشاب ياسر زابيري، اللي كيلعب فْ فريق فاماليكاو البرتغالي، خَطف الأنظار ديال كْبار الأندية الأوروبية.
حسب داكشي اللي نشْرو موقع "Africafoot"، فإن نادي برشلونة الإسباني بَان عليه اهتمام جدي باش يضم هاد الموهبة المغربية الصاعدة. المسؤولين ديال برشلونة بداو كيديرو اتصالات أولية مْع الإدارة ديال الفريق البرتغالي، باش يشوفو إمكانية التعاقد مْعاه فْ إحدى الفترات ديال الانتقالات اللي جايين.
وبرشلونة ماشي هو النادي الوحيد اللي مهتم بـ زابيري، حيت نفس المصدر أكد بلي حتى نادي بنفيكا البرتغالي كيراقب اللاعب عن قُرب، وْ كيخطط حتى هو باش يدخل فْ مفاوضات رسمية باش يضمّو، وْ هادشي فْ ظل المنافسة الأوروبية القوية عليه.
وياسر زابيري كيتعتبر مّن أبرز الوجوه المغربية الواعدة فْ الكُرة الأوروبية، بفضل المهارات التقنية العالية اللي عندو وْ السرعة فْ المراوغة وْ صناعة اللعب، وهاد المؤهلات خلات منو مشروع ديال نجم مستقبلي كيثير الاهتمام ديال أكبر الأندية فْ أوروبا.